ТҮРКІСТАН: ҚАЗЫҒҰРТТА ТАЗАЛЫҚ ЖҰМЫСТАРЫ ТҰРАҚТЫ ЖАЛҒАСУДА

Елімізде сәуір айынан бері Мемлекет басшысы Қасым-Жомарт Тоқаевтың бастамасымен «Таза Қазақстан» жалпыұлттық экологиялық акциясы жүріп жатыр, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.  Бұл – тұтас халықты ұйыстырған берекелі бастама болды.

Бұл жөнінде Президентіміз Жолдауында: «Осындай игі шаралардың арқасында қоғамда жаңа мәдениет, жаңа қоғамдық этика орнығып келеді. Мұны туған елге деген сүйіспеншілік, жанашырлық деуге болады. Ұлттың жаңа сапасы осындай нақты шаралар арқылы қалыптасады. Бұл – уақытша науқан емес. Осы маңызды жоба жыл бойы жалғаса беруге тиіс» - дей келе, қоршаған ортаның тазалығы әркімнің күнделікті дағдысына айналуы қажет екенін басып айтты.

Аудан әкімі Азизхан Исмаиловтың бастамасымен қазығұрттықтар күнделікті жалпыаудандық сенбіліктер ұйымдастырып, аудан бойынша 13 ауыл округінде республикалық және облыстық маңызы бар көше бойларын, елді мекендерде, саябақтар мен скверлерде, мемлекеттік мекеме аулаларында, көпшілік орындарда және тұрғындардың жеке жайларында ағаш бұтау, қоқыстардан тазарту, әктеп-әрлеу, су ағарлар мен арық-атыздарды, каналдарды тазарту, таулы аймақтарда қар күреу сынды жұмыстарды жүргізуде. Атаулы сенбіліктерге арнайы техникалар да тартылып, аудандық полиция бөлімінің қызметкерлері де жұмылдырылған. Айта кетейік, қоғамдық орындарда, көше бойларында тазалықты сақтамай, қоршаған ортаны ластаған жеке және заңды тұлғаларға ескертулер беріліп, қайта тексеру нәтижесінде айтылған кемшіліктер орындалмаған жағдайда айыппұлдар салынуда.

Мұның баршасы отансүйгіштікке, табиғатты қорғауға, қоғамда экологиялық мәдениетті қалыптастыруға үндейтін шаралар. Сондықтан, Қазығұрт ауданында тазалық жұмыстары күнделікті жалғасын табатын болады.