ТҮРКІСТАН ОБЛЫСЫНЫҢ ТУМАСЫ ҒҰСМАН ҚЫРҒЫЗБАЕВ ЕЛДІҢ МАҚТАНЫШЫ

Парижде өтіп жатқан Олимпиада ойындарында қазақстандық татами шебері, Түркістан облысының тумасы, бүінде Алматыда тұратын Ғұсман Қырғызбаев қола медаль жеңіп алған, деп хабарлайды Bugin.kz порталы Turkistan_sport инстаграм парақшасына сілтеме жасап. 

Ғұсман Қырғызбаев Түркістан облысы, Төлеби ауданы, Диханкөл ауылында 1992 жылы 28 қыркүйекте дүниеге келген. Туған ауылында 5 сыныпқа дейін оқып, отбасы жағдайына байланысты Ордабасы ауданы, Темірлан ауылына көшіп келген. Сүйтіп 5 сыныптан бастап қазақ күресі үйірмесіне жаттығу сабағына барады. Алғашқы жаттықтырушысы Еркеғали Отызбаев. Бүгінде Темірлан ауылында орналасқан Ордабасы аудандық №2 балалар мен жасөспірімдер спорт мектебінде директордык тәрбие ісі жөніндегі орынбасары болып қызмет атқарады. 

Күрес түрін үйренгеннен кейін 9-10 сыныпта оқып жүріп Күмісбек Құлсариев ағайында жаттығуды жалғастырады. Мектеп қабырғасын бітірген соң отбасымен бірге Алматы қаласына көшіп, Оңтүстік астанада Жоғары оқу-орнына оқуға түсіп, дзюдо күресімен шұғылдануды Ермек Нәсиев ағайының қолында жалғастырады. Бұған дейін ол Халықаралық додаларда жеңімпаз атанып, ел мерейін асқақтатып жүр.

Айта кетейік, Ғұсман Қырғызбаев – 2021 жылғы әлем чемпионатының күміс жүлдегері, 2019 және 2022 жылдары өткен Азия біріншіліктерінің қола медаль иегері.