Түркістан облысының тумасы, Азия чемпионы Сағындық Тоғамбай туған жерге оралды

Таиландтың Чиангмай қаласында бокстан өткен Азия чемпионатында Отандасымыз Сағындық Тоғамбай топ жарды. Ұлттық құрама спортшысы 92 келіде ақтық сында тәжік боксшысы Парвиз Каримовті мерзімінен бұрын ұтып, Азия чемпионы атанды, деп хабарлайды Bugin.kz порталы Turkistan_sport инстаграм парақшасына сілтеме жасап. 

Осындай ғаламат нәтиже көрсеткен жерлесімізді Шымкент әуежайынан спорт майталмандары мен ауылдастары және туған- туыстары қарсы алып, зор құрмет көрсетті. Қарсы алу шарасында чемпионның ауылдастары жаттықтырушысы Мырзағали Айтжанов пен Сағындық Тоғамбайға бір-бір тұлпар мінгізіп, алдағы байрақты додаларда биік жетістіктер тіледі. 

Айта кетейік, Ұлттық құрама сапында Түркістан облысының 4 спортшысы өнер көрсетті. Атап айтқанда: Сәкен Бибосынов (51кг), Мұхаммедсабыр Базарбайұлы (63,5), Сағындық Тоғамбай (92) және әйелдер арасында Ұлжан Сәрсенбек (57) сынды талантты жерлестеріміз қатысып, ел намысын қопғап қайтты. Аталған спортшылар «Түркістан кәсіпқой бокс клубының» шәкірттері. 

Биылғы Азия чемпионатында еліміздің ерлер құрамасы 4 алтын, 5 күміс, 1 қола медальмен жалпы командалық есепте 2-орында аяқтады.