ТҮРКІСТАН ОБЛЫСЫ МЕН ТҮРКИЯ ЕЛІНІҢ АРАСЫНДА МЕДИА БАЙЛАНЫС ОРНАТЫЛМАҚ

Түркістан облысы әкімінің бірінші орынбасары Зұлпыхар Жолдасов бастаған өңір делегациясы іссапармен Түркия еліне барды. Жұмыс сапары барысында Ыстанбұл қаласындағы «Аlbayrak Media Group» холдингінің кеңсесінде болып, холдинг басшылығымен өзара тиімді ынтымақтастық орнату туралы уағдаласты, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.   

Кездесу барысында Зұлпыхар Жолдасов екі ел ынтымақтастығының мүмкіндіктеріне тоқталды.

Сонымен қатар «Turkistan Media Holding» мекемесінің бас директоры Жанахмет Ағыбаев екі холдингтің бірлескен жобаларын жүзеге асыру бойынша ұсыныстарын айтты. «Бірінші кезекте өзара контент алмасуды жолға қойып, көрермендерге екі елді кеңінен танытатын деректі фильмдерді бірлесе түсіруді ұсынамын. Сіздер тарапынан қызығушылық болса бірлескен реалити-шоу және телесериал түсіруге де дайынбыз», деді Жанахмет Ағыбаев.

«Аlbayrak Media» холдингінің Ақпараттық директоры Өмер Қабылан бұл ұсыныстарды қуана қабыл алып, жақын арада Түркістанға сапарлап келуге шешім қабылдап отырғанын айтты. Сол кезде ресми келісімге қол қойып, екі медиа холдинг арасындағы бірлескен жобаларды тез арада бастауға дайын екенін жеткізді.

«Аlbayrak Media» – Түркиядағы ең жас әрі беделді БАҚ. Холдингтің көпке танымал негізгі интернет ресурстарынан бөлек ТV NET, GZT телеарналары да бар.