«Зорлық-зомбылыққа қарсы 16 күн» республикалық акциясы бастау алды

Бүгін Түркістан облысы, Созақ ауданында аудандық «Мыңжылқы» мәдениет үйінде еліміздегі әйелдер мен балаларға қатысты зорлық-зомбылықтың алдын алу мақсатында ұйымдастырылған «Зорлық-зомбылыққа қарсы 16 күн» республикалық акциясының ашылу шарасы өтті. Бұл бастама гендерлік теңдікті қамтамасыз ету, әйелдердің құқықтарын қорғау және зорлық-зомбылыққа қарсы күрес бағытындағы маңызды қадам болып табылады, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.    

Шараның ашылуында арнайы сөз алған аудан әкімінің орынбасары Серік Маманов

-«Бұл акция тек зорлық-зомбылыққа қарсы күресудің символы ғана емес, сонымен бірге, оның алдын алу мен қоғамның барлық мүшелерінің жауапкершілігін арттыруға бағытталған маңызды қадам»,-деп зорлық-зомбылықтың алдын алу үшін әрбір азаматтың белсенділігі мен түсіністік танытуы қажеттігін сөз етті.

Сонымен қатар, аудан әкімі аппаратының басшысы, әдеп жөніндегі уәкілі Абуахат Бакиров және Созақ аудандық полиция бөлімінің бастығы, полиция полковнигі Нұрлан Мұратов акция аясында әйелдерге қатысты зорлық-зомбылықтың алдын алу, құқықтық көмек және психологиялық қолдау көрсету жұмыстарын күшейту қажеттілігін айтты. Сондай-ақ аталған шараның қоғамдағы әйелдер мен балалардың қауіпсіздігін қамтамасыз етудегі маңыздылығын ерекше атап өтті.

Бұған қоса, Созақ аудандық орталық аурухананың бас дәрігері Бейбіт Төреханов пен аудандық ардагерлер кеңесі төрағасының орынбасары, аудандық "Әжелер алқасының төрайымы" Мәруа Қайыржанқызы және аудандық аналар кеңесінің төрайымы Рысты Райымқұлова да сөз алып, шараның маңыздылығына тоқталды. Акцияның әлеуметтік маңыздылығы мен отбасындағы тыныштық пен қауіпсіздік мәселелерін шешуде әр азаматтың жауапкершілігін арттыру қажеттігін білдірді.

Шара аясында отбасы құндылықтарын дәріптейтін сахналық көрініс қойылып, ата-ана мен балалар арасындағы түсіністік пен сыйластықтың маңыздылығы дәріптелді.

Айта кетейік, «Зорлық-зомбылыққа қарсы 16 күн» республикалық акциясы – бұл тек қоғамдық шара ғана емес, ол әйелдер мен балалардың құқықтарын қорғауға, зорлық-зомбылықтың алдын алуға, қоғамда әділеттілік пен теңдікті нығайтуға бағытталған ауқымды бастама болып табылады. Алдағы күндері акция аясында өтетін іс-шаралар қоғамдағы зорлық-зомбылыққа қарсы мәдениетті қалыптастыруда маңызды рөл атқаратыны сөзсіз.