ҰЛТТЫҚ ТӘРБИЕ МҰРАСЫН ДӘРІПТЕГЕН «ТЕРІСКЕЙ» ТОБЫ ЖҮЛДЕЛІ ІІІ ОРЫНҒА ИЕ БОЛДЫ

Түркістан қаласындағы “Фараб” кітапханасында облыстық қоғамдық даму басқармасы мен “Серпіліс” қоғамдық қорының қолдауымен «Бабалар дәстүрі – тәрбиенің бастауы» атты облыстық байқау өткізілді. Бұл байқау ата-бабаларымыздан қалған құнды мұраларды насихаттап, ұлттық тәрбиенің негіздерін ұрпақ санасына сіңіру мақсатында ұйымдастырылды, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.    

Аталған шараға облыстың әр аймағынан 21 топ қатысып, қазақтың ұлттық салт-дәстүрлері мен әдет-ғұрыптарын дәріптейтін түрлі шығармашылық жұмыстарын ұсынды. Байқаудың алғашқы кезеңінде қатысушылар бүгінгі ұрпақ тәрбиесі мен ел бірлігін нығайту үшін маңызды саналатын тақырыптар – отау көтеру, тәрбие, отбасы және тұрмыс дәстүрлері мен еңбек тәрбиесін сахналық қойылым арқылы көрсетті.

Ұлттық болмыс пен қазақы дәстүрлер ұлықталған байқауда Таукент кентінен құралған “ТЕРІСКЕЙ” тобы жүлделі ІІІ орынды иеленіп, арнайы сыйлықтармен марапатталды.