«ҚЫС-2024» РЕСПУБЛИКАЛЫҚ КОМАНДАЛЫҚ-ШТАБТЫҚ ОҚУ-ЖАТТЫҒУЫ ӨТТІ

Бүгін Түркістан облысы, Созақ ауданында қыс мезгілінде орын алуы мүмкін төтенше жағдайлардың алдын алу және оларға тиімді әрекет ету мақсатында «Қыс-2024» республикалық командалық-штабтық оқу-жаттығуы өтті. Ұйымдастырылған шараның мақсаты – азаматтық қорғаудың мемлекеттік жүйесін жетілдіріп, ауданымыздың күштері мен құралдарын қысқы кезеңдегі төтенше жағдайларға толықтай дайындау болды, деп хабарлайды Bugin.kz порталы Түркістан облысы әкімінің баспасөз қызметіне сілтеме жасап.    

Оқу-жаттығудың алғашқы сәтінде «Дабыл-1001» сигналы қосылып, басқару органдарының күштері мен құралдарын даярлыққа келтіру үшін жергілікті атқарушы органдар мен азаматтық қорғау қызметтеріне тиісті хабарлама берілді. Жоспардан тыс аудандық төтенше жағдайлардың алдын алу және жою бойынша комиссияның отырысы өткізіліп, барлық жауапты қызметкерлер мен мамандарға нақты тапсырмалар жүктелді.

Авариялық құтқару және шұғыл жұмыстар жүргізу үшін орындар анықталып, олар бойынша маршурттар белгіленді. Оқу-жаттығуға аудандық төтенше жағдайлар бөлімі, ішкі істер бөлімі, «Оңтүстік Жарық Транзит» ЖШС, Созақ аудандық электр желілері, байланыс торабы, аурухана және басқа да тиісті бөлімдер мен мекемелердің қызметкерлері қатысты.

Құтқарушылар мен техникалық қызметтері аясында электр желілері мен байланыс торабын қалпына келтіру бойынша нақты іс-қимылдар пысықталды. Сонымен қатар, өрт сөндірушілер мен медициналық қызмет көрсетушілердің, электр қуатымен қамтамасыз ету, газ жүйесінің апаттық қызметі, жолдарды қалпына келтіру және жанар-жағармаймен қамтамасыз ету қызметтерінің дайындығы да толық тексерілді. Бұған қоса азық-түлік және медициналық препараттар қорын құру мәселесі де жан-жақты қарастырылды.

Оқу-жаттығу барысында барлық жауапты қызметтер өзара үйлесімді жұмыс атқарып, қыс мезгілінде орын алуы мүмкін төтенше жағдайларға қарсы дайындықтарын пысықтады.