Танымал вайнерлер соттан мерзімінен бұрын босатуын сұрады

Бес жылға сотталған танымал вайнерлер Мейіржан Төребаев пен Мейірхан Шерниязов соттан мерзімінен бұрын босатуын сұрады, деп хабарлайды Bugin.kz порталы.

Вайнерлерге Mudarabah Capital қаржы пирамидасын құру ісі бойынша айып тағылған еді. Алматы қалалық сотының баспасөз қызметі Мейіржан Төребаев пен Мейірхан Шерниязовқа қатысты іс материалы Түрксіб аудандық сотына қарауға жолданғанын мәлімдеді. 

2022 жылғы ақпанда блогер Мейіржан Төребаев пен актер Мейірхан Шерниязов Mudarabah Capital қаржы пирамидасын құрды деген күдікке ілінген. Олар қазір сот үкіміне сәйкес, минималды қауіпсіздік мекемесінде жазасын өтеп жатыр. Оларға жұмыс уақытына колониядан шығуға рұқсат етілген. Сондай-ақ минималды қауіпсіздік мекемелерінде қарапайым жағдайда жазасын өтеп жатқан сотталғандар жатақханаларда тұратыны белгілі болды.

Соттың хабарлауынша, Төребаев пен Шерниязовтан басқа сотталушылардың барлығы Қылмыстық кодекстің екі бабы бойынша кінәлі деп танылды. Атап айтар болсақ,  217-бап - "қаржы пирамидасын құру және басқару" және 262-бап - "ұйымдасқан топ, қылмыстық ұйым құру және басқару". Вайнерлер 5 жылға бас бостандығынан айырылған.