Шыршаны заңсыз кескендерге қанша айыппұл салынатыны белгілі болды

Шыршаны заңсыз кескендерге 3,7 млн теңгеге дейін айыппұл салынады. Бұл туралы Алматы облысының әкімдігі мәлімдеме жасады, деп хабарлайды Bugin.kz порталы. 

Әкімдік жаңа жыл қарсаңында заңсыздықтар көп орын алатынын хабарлады. 

“Жаңа жыл мерекесінің қарсаңында елімізде қылқан жапырақты ағаштарды (шырша, қарағай және басқалары) заңсыз кесу жағдайлары жиі кездеседі. Әсіресе, шыршалар дүкендерде және базарларда сатылатыны белгілі, бірақ оны заңсыз кесу – экологиялық қауіпті әрекет қана емес, сондай-ақ құқық бұзушылық болып саналады”, – делінген әкімдік хабарламасында.

Алматы облысы әкімдігінің мәліметінше, егер келтірілген залал 50 АЕК көлемінде болса, жеке тұлғаларға 369 200 теңге көлемінде айыппұл қарастырылған. Ал шағын кәсіпкерлік субъектілері немесе коммерциялық емес ұйымдар осындай құқық бұзушылық жасаса 1 107 600 теңге көлемінде, орта кәсіпкерлік субъектілеріне 1 476 800 теңге көлемінде айыппұл салынады. Ал ірі кәсіпкерлікпен айналысатын заңды тұлғаларға салынатын айыппұл көлемі 3 692 000 теңгені құрайды. Егер келтірілген шығын 50 АЕК көлемінен асатын болса, қылмыстық іс қарастырылған. 

Сонымен қатар әкімдік жаңа жылдық шырша мен қарағайды заңсыз кесудің салдары ауыр болатынын ескертті.