Шымкентте энергетика саласындағы лауазымды тұлғалар сотталды

Шымкентте өз қызметін асыра пайдаланған энергетика саласындағы лауазымды тұлғаларға үкім шықты, деп хабарлайды Bugin.kz порталы. 

Шымкентте энергетика саласындағы лауазымды тұлғалар мен "Қуатжылуорталық-3" КМК басшыларына қатысты сот үкімі шықты. Күдіктілер қаладағы жылу желілері мен электр беру желілеріне жөндеу жүргізуге бөлінген 1,1 млрд теңгеден астам бюджет қаражатын жымқырған.

"Лауазымды адамдар ұрланған қаражатты жылыстату үшін "қолма-қол ақша жасаушылар" тобын тартқан. Олар 7 пайыз мөлшерінде ақшалай сыйақы үшін бөгде тұлғаларға ресімделген 24 күмәнді кәсіпорын арқылы тауарларды жеткізу және қызмет көрсету жөніндегі мәмілелер туралы жалған құжаттар ұсынған”, - делінген хабарламада.

Қаржылық тергеу барысында қылмыстық жолмен алынған қаражатқа сатып алынған жылжымайтын мүліктер анықталды. Атап айтқанда, Шымкент және Астана қалаларындағы 2 пәтер, 1 тұрақ орны, Шымкент қаласындағы 3 жеке үй және банк шоттарындағы 50 млн теңге тәркіленген. 

Сот үкімімен барлық жеті айыпталушы 2 жылдан 7,5 жылға дейін бас бостандығынан айырылды. Оның ішінде энергетика басқармасының лауазымды тұлғалары, коммуналдық кәсіпорын басшылары және жеткізуші мекемелердің басшылары бар.