Талғар туралы ән жазған рэпер полиция бөлімшесіне шақыртылды

Талғардағы оқиғаға рэп арнаған Талдықорған тұрғынына "Ұсақ бұзақылық" баба бойынша хаттама толтырылды, деп хабарлайды Bugin.kz порталы. 

Бұл жөнінде рэпер әлеуметтік желідегі парақшасында хабарлады. Талдықорған тұрғыны Карим Асылбековке “былапыт сөз айтқаны үшін” (434-бап, “Ұсақ бұзақылық”) әкімшілік хаттама толтырылды.

Тректі сараптамаға жіберілген. Егер сараптамадан былапыт сөз айтылғанын тапса, айыппұл төлеуі мүмкін. 

“Маған шамамен 5 айлық есептік көрсеткіш мөлшерінде айыппұл салынуы мүмкін екенін айтты. Бұл 18-25 мың теңгенің айналасында. Өкінішті, тек қолдау ниетім болған”, - деді рэпер. 

Оның алдында рэпер Талғар оқиғасы туралы трекі үшін полицияға екі рет шақырылғанын айтты.

Шамамен бір минуттық тректе әнші Талғардағы оқиғадан зардап шеккендердің отбасына көңіл айтып, елдегі бірқатар мәселелерді баян етеді. Жемқорлықтың өршігеніне, шындықты айтқандарды қудалап жатқанына өкініш білдіреді.