Ақтөбе облысында 63 адамнан шошқа тұмауы анықталды

Ақтөбе облысында 63 адамнан шошқа тұмауы анықталды. Ауруға шалдыққандардың басым бөлігі – 14 жасқа дейінгі балалар мен жүкті әйелдер, деп хабарлайды Bugin.kz порталы. 

Биыл қазан айынан бері жедел респираторлық вирустық инфекциялар (ЖРВИ) және тұмау белгілерімен дәрігерлерге жүгінген 101 мыңнан астам тұрғынның 63-і шошқа тұмауын жұқтырған. 

“Шошқа тұмауы инфекциялық-уытты шокқа, жүрек-тамыр жүйесі мен тыныс алу органдарының зақымдалуына әкелуі мүмкін. Вакцинация болмаған кезде асқыну қаупі артады", - дейді Ақтөбе облыстық жұқпалы аурулар ауруханасы бас орынбасары Майра Нұрғалиева. 

Дәрігерлер облыс тұрғындарына бетперде тағуға және көпшілік жиналатын іс-шаралардан аулақ болуға кеңес береді. 

Айта кетейік, шошқа тұмауы жануарлардан жұғуы мүмкін. Кейін адамнан адамға жұғады. Науқас екі аптаға дейін өзгелерге ауру жұқтыруы ықтимал.