"Ақтау-Алматы" рейсінде кәмелетке толмаған қызға харассмент жасалған

"Ақтау-Алматы" рейсінің жолаушысы ұшақта жалғыз отырған кәмелетке толмаған қызды шошытып, оған харассмент жасаған, деп хабарлайды Bugin.kz порталы. 

Бұл туралы "Ақтау-Алматы" рейсінің жолаушысы Threads әлеуметтік желісінде мәлімдеді. Оқиға 21 желтоқсанда болған.  Оның айтуынша, ұшақта ер адам үлкендерсіз жалғыз ұшып бара жатқан кәмелетке толмаған қызға жақындап, оған тиісуге әрекет жасаған. Автордың айтуынша, ұшақ көтеріліп, борт ішіндегі жарық сөнген кезде кәмелетке толмаған жолаушы қыздың қасына мас адам отырған.

“Ұшу басталғанда жарық өшірілді, ол терезеден көріністі суретке түсіріп алсын деп, телефонды қызға берді. Кейін қыз видеоға түсіріп жатқанда, оған жақындап, қолынан ұстап оның атын, жасын сұрады. Әдемі екенін айтып, оның денесін сипай бастады. Қыз "маған тиіспе" деді. Сол кезде жарық жанды. 10 минуттан кейін бортсерік кіріп, қыздың жылап жатқанын көріп, оның себебін білді. Кейін қызды менің қасыма отырғызды. Біз оны тыныштандырдық, қыздың қасында отырдым. Ер адам ұйықтап қалған. Ал артта отырған жолаушылар болған оқиғаның куәгері болуға келісті. Ұшақтан түскен бойда қыз ата-анасына, ал ер адам полицейлерге тапсырылды", - деп жазды қазақстандық әйел. 

Күдікті полиция бөлімшесіне жеткізілген. Ол алкогольдік ішімдіктерді ішкені немесе қоғамдық орындарда мас күйінде жүргені үшін әкімшілік жауапкершілікке тартылады.  Жаза 5 АЕК (18 460 теңге) мөлшерінде айыппұл қарастырады.