Алматы облысының әкімі: “Мемлекеттік қызмет – баю жолы емес”

Алматы облысының әкімі Марат Сұлтанғазиев Jibek Joly телеарнасындағы “Уәде” жобасында мемлекеттік қызметтің маңыздылығын, оның жауапкершілігін және негізгі қағидаларын атап өтті, деп хабарлайды Bugin.kz порталы.

Әкім өзінің бұрынғы және қазіргі қызметін салыстырып, аймақтық деңгейдегі мемлекеттік қызметтің ерекшеліктеріне тоқталды.

“Оңай жұмыс жоқ. Орталықта да өзінің жауапкершіліктері бар, өзінің қиындықтары бар. Әкімдікте де дәл сондай өзінің қиындықтары бар. Егер менің бұрынғы істеген салам бойынша, қазір жылдың аяғы – бұл бюджет толтыру кезеңі. Ал өңірде басқа жұмыстар бар: экономиканы дамыту, қоғамдық тұрақтылықты сақтау”, – деді облыс әкімі.

Айта кету керек, облыс әкімі бұған дейін Қазақстан Республикасы Қаржы вице-министрі болған. Сонымен қатар сұхбат барысында, Марат Сұлтанғазиев мемлекеттік қызметтің байлыққа жету жолы емес екенін айтты.

“Мемлекеттік қызметкерлерге айтатын ақылым – мемлекеттік қызмет байығысы келетін адамдар үшін емес. Егер адам жағдайын жақсартамын, әлеуетін жоғарылатамын десе – онда ол бизнеспен айналысуы керек”, – деп атап өтті әкім.