“Ұшақты Ресей зымыраны атқан”: Баку Ресейдің мойындағанын күтіп отыр

Ақтау маңында апатқа ұшыраған AZAL ұшағын Ресей зымырандары атқан, деп хабарлайды Bugin.kz порталы. 

Тергеу барысын білетін төрт дереккөз Reuters агенттігіне Әзірбайжан авиакомпаниясының ұшағын ресейлік зымыран атып түсіргенін растады. Ресейдің әуе шабуылына қарсы қорғаныс зымыраны Бакуден ұшқан ұшақтың үстінде жарылып кеткен. Ал Ресейдегі жауапты мамандар бұл туралы уақытында хабарлай алмаған. Әрі 25 желтоқсан күні Мәскеу украиналық дрондардың соққыларына қарсы әуе қорғанысы жүйесін бірнеше рет қолданғаны белгілі болды. 

Енді Әзірбайжан билігі Ресейдің ресми мәлімдеме жасағанын күтіп отыр. 

“Ешкім бұл әдейі жасалды деп айтып жатқан жоқ. Алайда анықталған фактілерді ескере отырып, Баку Ресей тарапынан Әзірбайжан ұшағын атып түсіргенін мойындағанын күтіп отыр”, - делінген хабарламада.

Бұған дейін Қазақстанда апатқа ұшыраған ұшақты ресейлік әуе қорғанысы жүйесі атып түсіргені туралы Reuters-тен өзге Euronews хабарлаған болатын.