Ақтаудағы ұшақ апатын тергеуге Түркияның мамандары қатысады

Түрік мамандарынан құралған 8 адамнан тұратын топ Ақтау қаласы маңында Әзірбайжанның Azerbaijan Airlines авиакомпаниясы ұшағының апатқа ұшырауына қатысты тергеуге қатысады. Бұл туралы Түркияның көлік және инфрақұрылым министрі Абдулкадир Уралоғлу мәлімдеді, деп хабарлайды Bugin.kz порталы Anadolu басылымына сілтеме жасап. 

Оның айтуынша, сараптама комиссиясы Әзірбайжанның Азаматтық авиация агенттігінің сұранысымен құрылды.

«Біз техникалық және эксплуатациялық талдау жүргізіп, қажетті қолдау көрсетеміз. Біз билік органдарымен үйлесімді жұмыс істеп, оқиғаның барлық мән-жайын зерттеп, нәтижелерді хабарлайтын боламыз», - деді ол.

Уралоғлу делегация 27 желтоқсан кешке Бакуге аттанып, ертесі күні жұмысқа кірісетінін айтты.

«Түркия кез келген жағдайда Әзірбайжанға қолдау көрсетеді», - деп атап өтті ол.

Министр әуе апатында қаза болғандардың жақындарына көңіл айтып, жарақат алғандарға тезірек жазылып кетулерін тіледі.

Айта кетейік, Әзірбайжанның AZAL авиакомпаниясына тиесілі Embraer 190 ұшағы 25 желтоқсанда Баку–Грозный бағытындағы рейсін орындап келе жатып, Қазақстанның Ақтау қаласы маңында апатқа ұшырады. Ұшақтың бортына 67 адам, оның ішінде 5 экипаж мүшесі және 62 жолаушы болған. Апат салдарынан 38 адам қаза тауып, 29 адам аман қалған.