Ұшақ апатынан мерт болған жолаушының соңғы хаты жарияланды

Желіде Оңтүстік Кореяда апатқа ұшыраған ұшақ жолаушысының соңғы хаты тарады, деп хабарлайды Bugin.kz Stan.kz-ке сілтеме жасап. 

Марқұм ұшақ апаты болардан бұрын туысына хат жазған. Ол туысына жерге қона алмайтынын айтыпты. 

“Ұшақ қанатына құс тиіп кетті,  біз қона алмаймыз", – деп жазған марқұм туысына. 

Туысы бұл жағдайға таңырқап, қашан болғанын сұраған.

“Дәл қазір. Соңғы сөздерді айтатын кез келген сияқты?”, – деп жазған ол. 

Осы хабарламадан кейін онымен байланыс үзілген.

Еске салайық, кеше, 29 желтоқсанда Бангкоктан Оңтүстік Кореяның Муан қаласына ұшқан Jeju Air Boeing 737-800 ұшағы Муан әуежайына қону кезінде апатқа ұшыраған еді. Ұшақ апаты жергілікті уақыт бойынша таңғы сағат 9:07-де болған. Ұшақ ұшу-қону жолағынан асып түсіп, қоршауға соғылып, өрт шықты.

Бортта 181 адам болған. Олардың екеуі аман қалды - олар ұшақ экипажы мүшелері болып шықты, бір әйел және бір ер адам. Олар орташа және ауыр жарақат алып, ауруханаларға жеткізілді. Жергілікті биліктің алдын ала мәліметі бойынша, ұшақтағы жолаушылар арасында қазақстандықтар болмады.