“Баламның сүйегін бір жарым айдан соң таптым”: Қанды қаңтардағы тағы бір қайғылы оқиға

Шымкентте Қаңтар оқиғасы кезінде іші мен басына оқ тиіп көз жұмған Абылай Ергештің мәйітін туыстары бір жарым айдан кейін тапқан, деп хабарлайды Bugin.kz порталы.

Азаттықтың “Қанды қаңтар құрбандары” атты кітабында Абылайдың оқиғасы егжей-тегжейлі баяндалады. Көз жұмған Абылайдың үстінен “Жаппай тәртіпсіздік” бабымен іс қозғалған. Абылайдың анасы Жанар Дүйсебаева баласының жалғыз жұбанышы екенін айтады. Қызы Алматыда, ал ұлы өзімен бірге Шымкентте тұрған екен. 

Абылай Ергеш Шымкенттегі Өзбекәлі Жәнібеков атындағы мектепте оқыған. 9-сыныптан кейін, колледжге оқуға түсіпті. 

"22 қаңтар баламның туған күні. 18 жасқа толғаннан кейін шетелге жұмыс істеуге кетемін деп дайындалып жүрді. Құжаттарын да алған. Қалада митинг басталғанда “Ешқайда барма” дедім. “Мам бармаймын” деген. Соңғы сөйлескеніміз — осы”, - дейді марқұмның анасы. 

Абылай Шымкентте 6 қаңтар күні болған жаппай наразылыққа қатысады. Ол жерде жүздеген адам түрлі жарақатпен ауруханаға жеткізіледі. Жанар баласын ауруханадан, мәйітханадан, тіпті полиция бөлімшесінен де таппайды. Үміті сөнбей, “достарының үйінде шығар” деп ойлайды. 18 қаңтар күні із-түзсіз жоғалған ұлын анасы полицияға айтады. 19 қаңтар күні Абылайдың денесі мәйітханадан табылды. 

Абылай Ергеш 20 қаңтар күні жер қойнына табысталды. Кейін оның анасын полиция шақырып, баласының үстінен қылмыстық іс қозғалғанын мәлімдеді. Тергеу қаулысында Абылай Ергеш 6 қаңтар күні басына, ішіне оқ тиіп, ауруханаға жеткізілгені жазылған. Оны дәрігерлер аман алып қала алмады. 

Шымкентте 20 адамның өліме қатысты тергеу тоқтады. Бірақ “жаппай тәртіпсіздік” бабымен қозғалған іс әлі жалғасып жатқан көрінеді. Марқұмның анасы баласының өлімін үкіметтен дауламайтынын айтты. 

17 тамыз, 2022 жыл.