Сотталуы мүмкін: Марқұм Шерзаттың отбасына тағы бір жағымсыз жаңалық келді

Талғарда кісі қолынан қаза болған Шерзат Полаттың әкесі Қаржаубай Нұрымовқа қатысты қылмыстық істі сыбайлас жемқорлыққа қарсы іс-қимыл агенттігі департаменті тергеп жатыр, деп хабарлайды Bugin.kz порталы. 

 Informburo.kz  мәліметінше, Қаржаубай Нұрымовтың үстінен полиция қызметкеріне қауіп төндіру фактісі бойынша іс қозғалған.

“Азамат қоғамдық орында заңға қайшы әрекет жасағандықтан, оны ұстау туралы шешім қабылданды. Полиция қызметкерлеріне күш қолдану қаупі бойынша қылмыстық іс қозғалып, одан әрі тергеу үшін іс Алматы облысы бойынша сыбайлас жемқорлыққа қарсы іс-қимыл агенттігі департаментіне жіберілді”, - деп мәлімдеді министрлік өкілдері.  

Сонымен қатар, Нұрымовқа қатысты сотқа дейінгі тергеуді неліктен сыбайлас жемқорлыққа қарсы іс-қимыл агенттігі департаменті жүргізіп жатқаны нақты көрсетілмеген.

Бұған дейін, облыстық полиция департаменті Нұрымовқа бөтеннің мүлкін қасақана бүлдіру фактісі бойынша қылмыстық іс қозғалғанын мәлімдеген болатын.  

“10 желтоқсанда Еңбекшіқазақ ауданы Азат ауылында болған заңсыз әрекеттер салдарынан көлік иесіне материалдық шығын келтірілгені анықталды. Бұл әкімшілік жауапкершілік шегінен айтарлықтай асып, қылмыстық сипаттағы іс ретінде бағаланды”, - деп жазылған департамент хабарламасында.

Талғарда болған кісі өлімі фактісі бойынша қылмыстық істен бөлек тағы да 8 қылмыстық іс тірелген. Сол үшін тергеу жұмыстары кешігіп жатқан көрінеді. 

"Құқық бұзушылық, бұзақылық, қоқан-лоққы көрсету және қылмыс туралы хабарламау фактілері бойынша қосымша 8 қылмыстық іс тіркелді. Іс бойынша 11 адамға қатысты "қамауға алу" түріндегі бұлтартпау шарасы қолданылды. Қазіргі уақытта сотқа дейінгі тергеу жүргізілуде, оның нәтижесінде процестік шешім қабылданады", - деп жауап берді ішкі істер министрлігі.

Айта кетейік, 2024 жылдың 4 қазанында Талғарда 16 жастағы Шерзат Полат кісі қолынан қаза тапқан еді.