Балағаттаған: Атырауда мұғалім жиналыстан кейін өзіне қол жұмсамақшы болған

Атыраудағы №37 орта мектепте ағылшын тілі пәнінің мұғалімі педагогикалық кеңесте өзін балағаттаған соң, суицид жасамақ болды. Оқу-ағарту министрлігі жағдайға қатысты түсінік берді, деп хабарлайды Bugin.kz порталы.

Әлеуметтік желіде жарияланған ақпарат бойынша ұстазды педагогикалық кеңесте жұрт алдында балағаттап, алаяқтық жасады деп айыптаған.

Оқу-ағарту министрлігі Білім сапасын қамтамасыз ету комитетінің баспасөз қызметі оқиғаға қатысты түсінік берді. Ведомствоның мәліметінше, жағдай комитеттің бақылауында екен. 

"Жағдайды анықтау үшін қалалық басқарманың, Атырау облысы әкімдігінің білім басқармасының және Оқу-ағарту министрлігінің білім сапасын қамтамасыз ету аумақтық департаментінің өкілдерінен тұратын арнайы комиссия құрылды", - делінген хабарламада.

Қазір мән-жайды жан-жақты зерттеу үшін тергеу басталды.

"Министрліктің аумақтық департаменті педагогикалық әдеп мәселелері бойынша жоспардан тыс өңірлік кеңес өткізеді, оның қорытындысы бойынша тиісті шаралар қабылданады", - деп атап өтті ведомство.

Комитеттің баспасөз қызметі ұстаздың жағдайы тұрақты екенін хабарлады.