«Жақын танысы»: Ақтөбеде адамдарды кепілге алу оқиғасының егжей-тегжейі айтылды

Ақтөбеде белгісіз адам қызды кепілдікте ұстап, оның егде жастағы ата-анасын жертөлеге қамаған, деп хабарлайды Bugin.kz порталы. 

Бұл туралы ақпарат кеше, 13 қаңтар күні түнгі 23:40 шамасында тарады. Оқиға орнына полиция басшысы мен прокурор барды. Полиция ер адаммен келіссөз жүргізіліп жатқанын мәлімдеді. 

“102 пультіне жеке үйлердің біріне белгісіз адам кіріп кетіп, қызды кепілге алды деген хабар келіп түсті. Сол жерге барлық төтенше қызмет өкілдері жіберілді. Сол аудан қоршауға алынды. Полиция департаментінің бастығы, қала прокуроры сол жерде жүр, келіссөз жүргізіліп жатыр”, - деп хабарлады полиция.

Кейін ер адам ұсталды. Кепілде болғандар ауруханаға жеткізілді.

3 адамның екеуі пышақ жарақатынан көз жұмды. Мәліметтерге сүйенсек, олар қыздың өгей әкесі мен анасы екен. 

Полицияның мәліметінше, күдікті ешқандай талап қоймаған. 

"Күдікті ешқандай талап қоймаған. Үш сағаттық келіссөздерден кейін және күдікті кепілге алынған адамды босату туралы талаптарды орындаудан бас тартқан. Сол себепті шабуыл жасау туралы шешім қабылданған",  - деді полиция өкілдері.

Арнайы операция нәтижесінде күдікті ұсталып, кепілге алынған әйел босатылды.