Алаяқтық жасады: Президенттің экс-көмекшісі ұсталды

Қырғызстан президентінің бұрынғы көмекшісі Хайдарали Халиков Молдовада ұсталды, деп хабарлайды Bugin.kz порталы. 

Бұл мәліметті Қырғызстанның ішкі істер министрлігі растады. 

Мәліметтерге сүйенсек, Халиков қызметтік жағдайды пайдалана отырып жасалған ірі алаяқтыққа күдікті ретінде іздеуде болған. Мемлекеттік қызметкер ретінде ол белгілі бір адамның ақшасын алдап алып, оған материалдық шығын келтірген. Сонымен қатар Халиков бірқатар осыған ұқсас қылмыстар жасады деп күдікке ілінді. 

Қырғызстанның бас прокуратурасы ұсталған адамды экстрадициялау мәселесін талқылап жатыр.

Жергілікті БАҚ-тың мәліметінше, өткен жылдың қараша айында ҚР президенті әкімшілігінің ақпараттық саясат қызметінің басшысы Дайырбек Орынбеков Халиков қызметін өз мүддесі үшін пайдаланғанын айтқан еді. Ол Өзбекстаннан шифер контрабандасымен айналысқан, әрі әкімдерге, ведомство басшыларына өз мәселелері бойынша келіп, оларға қысым жасаған көрінеді. Қырғызстан президенті Садыр Жапаров бұл туралы біліп, өзінің барлық көмекшілері мен кеңесшілерін қоғамдық негізде мәртебесінен айырды.