Сәлемдеме алған студент 8 жылға сотталды

Колледж студенті 8 жылға қамалды, деп хабарлайды Bugin.kz порталы. 

Астананың қылмыстық істер жөніндегі мамандандырылған ауданаралық сотында кәмелетке толмаған колледж студентінің ісі қаралды. 

Студент электронды ақпараттық ресурсты пайдалана отырып, алдын ала сөз байласу арқылы ірі мөлшерде есірткі затын өткізу мақсатында заңсыз иемдену, сақтау (ҚК 297-бабы 3-бөлігінің 1, 5) тармақтары), сондай-ақ алдын ала сөз байласу арқылы ірі мөлшерде Қазақстан Республикасының мемлекеттік шекарасы арқылы есірткі затын заңсыз өткізуге көмектесу (ҚК 28-бабының 5-бөлігі – 286-бабы 2-бөлігінің 4, 5) тармақтары) деректері бойынша сотталды. 

"Сотталушы Б. кәмелетке толмаған колледж студенті бола отырып, Telegram мессенджеріндегі "В" аккаунтын пайдаланушымен келісім бойынша тыйым салынған заттарды сақтайтын "қоймаға" жұмысқа орналасқан. Аккаунт пайдаланушысы Б.-ның жеке деректерін пайдалана отырып, Таиланд Корольдігінен халықаралық пошта арқылы Қазақстан Республикасына 998 грамм есірткі заты – марихуананы (кептірілген) жіберген", - делінген хабарламада.

2024 жылғы 6 тамызда Б. "Қазпочта" АҚ филиалынан есірткі заты бар жөнелтілімді алған, яғни есірткі затын заңсыз иемденген. Одан кейін есірткі затын сату және дозаға орау мақсатында заңсыз сақтау үшін пәтер жалдаған. Полиция Б.-ның үйін тінту барысында 998 грамм кептірілген марихуана тапты. 

Студент 8 жылға сотталды.