“Әскерде мерт болған”: Марқұм сарбаздың әкесін судья сот залынан қуып шықты (ВИДЕО)

Маңғыстауда әскери борышын өтеп жүрген сарбаздың өліміне қатысты сот отырысы басталды, деп хабарлайды Bugin.kz порталы. 

Видеоны мына сілтемеден көресіз.

Кеше, 14 қаңтар күні Астанадағы әскери сотта 19 жастағы сарбаз Марат Барқұловтың өліміне қатысты алғашқы сот отырысы басталды. 

19 жастағы мерзімді қызметтегі сарбаз Марат Барқұловтың әкесі Ербол Күнтінов соттың ашық өтуін және БАҚ өкілдерінің қатысуын талап етті. Судья бастапқыда журналистерді сот залына кіргізбеді. Кейін БАҚ өкілдері залға кіргенде, ол айыпталушы – 25744 әскери бөлімінің зенитті-артиллериялық взвод командирі Дамир Досовтың адвокаттарын тыңдап, олардың сотты фото, видео және аудиожазбасыз өткізуді сұраған өтінішін қабылдады. Осыдан кейін марқұмның әкесі Ербол Күнтінов сөйлеп отырысты адвокаттың қатыспауына байланысты кейінге шегеруді сұрады. Барқұловтар отбасы соттың ашық өтуін қалаған. Алайда судья оған өз өтінішін толық жеткізуге мүмкіндік бермеді. Бұған наразы болған Ербол Күнтінов судьяға қарсылық білдірді, ал судья сот приставына оны залдан шығаруды бұйырды.

Марқұмның әкесі ұлының ел алдындағы борышвн өтеуге кетіп, өлім құшқаны үшін өз наразылығын білдірді. 

“Сіздер көрдіңіздер ғой? Олар арандатып отыр. Айыпталушы тараптың өтініші қабылданды, біздікі неге тыңдалмайды? Бұл ең алдымен менің ұлыма қатысты іс. Мен заң бұзған жоқпын. “Судья ханым, менің өтінішімді неге тыңдамайсыз?” деп сұрадым. Маған “отырыңыз” деп қысқа қайырды. Мен шыдамай, орнымнан тұрып айттым. Ол приставқа мені залдан шығаруды бұйырды. Пристав мені қолымнан ұстап, 102-ні шақырды. Бұл қандай сот сонда? Ұлым ел алдындағы борышын өтеуге кеткені үшін бе? Әділдік қайда? Мен судьяға қарсылық білдіремін. Президент әкімшілігіне барамын. Сол жерде тамырымды, тамағымды кесемін! Судья мен үшін жауап береді”, – деді марқұмның әкесі Ербол Күнтінов.

Еске салайық, Марат Барқұлов э 7 қыркүйек күні мерт болды. Қайғылы жағдай "Батыс" өңірлік қолбасшылығы бөлімшелерінің Маңғыстау облысы "Оймаша" полигонында өткен оқу-жаттығу жиынында болған. Ақтау гарнизоны баспасөз қызметіне сілтеген жергілікті басылымдардың хабарлауынша, "қаруды қолдану ережесін бұзу салдарынан" қатардағы жауынгер мерт болған.