Көршісі ұстап берді: Көлігін 5 минуттан артық қыздырған адам айыппұл арқалады

Петропавл тұрғыны көлігін 5 минуттан артық қыздырғаны үшін айыппұл арқалады, деп хабарлайды Bugin.kz порталы. 

Тұрғынды полицияға көршісі ұстап берді. Мәліметтерге сүйенсек, олардың арасында өзара жанжал туындаған екен. Нәтижесінде көлік иесіне 5 АЕК (19 660 теңге) айыппұл салынды.

Дегенмен айыппұл арқалаған адам мен өңір тұрғындары мұндай айыппұлдың әділетсіз екенін айтады. Себебі ауа температурасы кейде -40 градусқа дейін төмендейтін аймақта көлікті 5 минутта жылыту мүмкін емес деп отыр. Бұл тұрғыда өңірдің климаттық ерекшеліктері ескерілмегені айтылды. 

Бұған дейін көлігін 5 минуттан ұзақ қыздырғандар айыппұл арқалайтыны айтылған еді.

Депутаттар ережені елдегі әрбір өңірдің климаттық және температуралық жағдайды ескере отырып, қайта әзірлеу бастамасын көтерді. Сөздерінше, экологияны қорғау үшін басқа тәсілді қолданған жөн екен. 

Айта кетейік, заң нормасы 20 жыл бұрын енгізілген. Алайда көлігін 5 минуттан артық қыздырғанбірде-бір жүргізушіге айыппұл салынған емес. 

Депутат Серік Ерубаев -20, -30 градуста көлікті өшіріп қою қисынсыз екенін айтты. 

“Немесе аязды күні балаларды мектеп пен бақшадан алғанда балаларды суық көлікке қалай отырғызамыз? Суық өңірлерде машинаны қыздыруға 5 минут жетпейтіні айдан анық”, - деді депутат.