Қазақ азаматы тұңғыш рет әлемдегі алпауыт компанияның басшылық қызметіне тағайындалды

Әділхан Қопабаев Apple компаниясында жетекші қызметке тағайындалған тұңғыш қазақ атанды. Бұл туралы цифрлық даму, инновациялар және аэроғарыш өнеркәсібі министрі Жаслан Мәдиев мәлімдеді, — деп хабарлайды Bugin.kz.

"Біздің отандасымыз, digital nomad Әділхан Қопабаев Apple компаниясында жетекші қызметке тағайындалғанын хабарлаймын. Енді Әділхан Орталық Азия және Армения аймағын қадағалайтын болады. Бұл жаңа кезең оған көптеген жетістік пен кәсіби өсу әкелсін", — деп жазды министр.

Айта кетейік, Әділхан Қопабаев Ақтөбенің тумасы. Жасы 29-да. 

Ол 2017 жылы Оңтүстік Кореядағы Ульсан ұлттық ғылым және технологиялар институтын “қала инженері және технологиялық менеджмент” мамандығы бойынша үздік тәмамдаған.

Сонымен қатар UNIT Global UniStar стипендиясының иегері. 2021 жылы АҚШ-та орналасқан Браун университетін аяқтап, Рокфеллер қорының стипендиясына ие болды. Білікті маман халықаралық консалтингтік және IT компанияларда жұмыс істеген.

2023 жылдан бастап ҚР Энергетика министрлігіне қарасты “Мұнай және газ ақпараттық-талдау орталығын” басқарды және Қазақстанның мұнай-газ саласының “Жағдайлық-талдау орталығы басқармасының төрағасы болды.