Инстаграмға қазақ әндері қашан қайтады?

Жуырда Meta компаниясы қазақ әндерін инстаграмға қайтаруы мүмкін, деп хабарлайды Bugin.kz порталы. 

Бұл туралы әділет вице-министрі Ботагөз Жақселекова айтты. Вице-министрдің айтуынша, инстаграмға иелік ететін Meta компаниясы қазақстандық әртістердің аторлық құқықтарын қорғак үшін ұжымдық басқару ұйымдарымен келіссөздер жүргізіп жатыр. Себебі 2025 жылға арналған келісімшартты қайта қарау кезінде мәселелер туындаған екен. Жақселекованың сөзінше, келіссөздер әлі жүріп жатыр, алайда олардың қашан аяқталатыны белгісіз.

Бұл ұйымдар мен инстаграм арасындағы азаматтық-құқықтық қатынастар болғандықтан әділет министрлігі бұл келіссөздерге араласпайтынын мәлімдеді. 

"Мәдениет және ақпарат министрлігімен бірлесіп, бұл жағдай қоғамда, соның ішінде инстаграм қолданушылары арасында үлкен резонанс туғызғанын ескере отырып, Meta компаниясына жүгінгенбіз. Олар келісімшарт талаптарын жариялай алмайтынын, бірақ жақын арада ортақ келісімге келеді деп үміттеніп отырғанын айтты", - деді Жақселекова.

Айта кетсек, былтыр желтоқсанның басында инстаграм әлеуметтік желісінен қазақ әндері жойылып кеткен еді. Мәселе тарифтер мен төлемдер мөлшеріндегі даудан туындаған.