Қонаққа барған: Ақтөбеде болған қанды оқиғаның мән-жайы толық айтылды

Ақтөбеде бір отбасыны кепілге алған ер адам бұған дейін де жауапкершілікке тартылған екен, деп хабарлайды Bugin.kz порталы Halyqstan телеграм арнасына сілтеме жасап.

Бұл оқиға 2024 жылы болған. 1986 жылғы ер адам өзі кепілге алған әйелді балағаттағаны үшін бес тәулікке қамауға алынған. Әйел сол жылы ер адамды өзіне қатысты әдепсіз сөздер айтты деп айыптап, үстінен арыз жазған. Сот отырысында ол өзін бұл азаматтан қорғауды сұраған.

Күдікті осыған дейін 40 жастағы сүйіктісімен бірнеше рет жанжалдасқаны белгілі болды.

Мәліметтерге сүйенсек, ер адам әйелмен бірге тұрған. Сондықтан қылмыс болатын күні ол әйелдің ата-анасының үйіне оңай кіріп кеткен екен. 

Әйел ата-анасымен бірге тұрмаған. Сол күні ол ата-анасына қонаққа барғаны айтылды. Күдікті үйге кіре салып, әйелдің 74 жастағы өгей әкесіне және 67 жастағы анасына пышақ жарақатын салған. Ер адам оларға жарақат салғаннан  кейін, сүйіктісін басқа бөлмеге қамап, денесін пышақпен тілгілеп, ұрып-соққан. Бұл кезде әйелдің 17 жастағы ұлы үйде болмаған. Жігіт үйіне келгенде, қан іздерін көріп, дереу туыстарын көмекке шақырған. Ал олар полицияға хабарласқан.

Тәртіп сақшылары күдікті Б-мен үш сағат бойы келіссөз жүргізді, бірақ ол ешқандай талап қоймағандықтан және кепілге алынғандарды босатпағандықтан, үйге басып кіру туралы шешім қабылданған.

Еске салайық, Ақтөбеде 3 адамды кепілге алған ер адам ұсталды. Әйелдің ата-анасы алған жарақатынан мерт болды. 40 жастағы әйел есін жиды. Бірақ ата-анасының қазасы туралы әлі білмейді.