Келесі аптаға арналған ауа райы болжамы

Синоптиктер алдағы күндерге арналған ауа райы болжамын ұсынды, деп хабарлайды Bugin.kz порталы. 

Келесі аптада орталық пен шығыста 35 градусқа дейін аяз күтіледі екен. 

Метеорологтардың мәліметінше, алдағы күндері Атлант мұхитынан келген ылғалға толы циклон Қазақстан аумағындағы ауа райына ықпал етеді. Осыған байланысты ел аумағында жел күшейіп, қар, бұрқасын, тұман және көктайғақ күтіледі. Қазақстанның батысы мен оңтүстігінде, 20-21 қаңтарда солтүстік өңірлерде жаңбыр және қар аралас жауын-шашын түсуі ықтимал. 18 қаңтарда Түркістан облысында түнде қатты жауын-шашын күтіледі. 20 қаңтарда Ұлытау, 21 қаңтарда Ақтөбе, Қостанай және Солтүстік Қазақстан облыстарында, 21-22 қаңтарда Ақмола облысында, 22 қаңтарда Павлодар, Қарағанды, Түркістан, Жамбыл және Абай облыстарында, 22-23 қаңтарда Шығыс Қазақстан, Алматы және Жетісу облыстарында қатты қар жаууы ықтимал. 22 қаңтардан бастап суық ауа массасы таралып, түнде температура айтарлықтай төмендейді.