"Ағасын өлтіріп, әпкелерін пышақтаған": Отбасын қырған жігіттің қандай ойын ойнағаны белгілі болды

Астанада 21 жастағы жігіт отбасын пышақтап тастады. Ол өзіне сын айтқаны үшін кек алмақшы болған. Жігіт ағасы мен әпкелерін пышақтаған. Ағасы оқиға орнында мерт болды. Ал әпкелері ауруханаға жеткізілді, деп хабарлайды Bugin.kz порталы. 

Журналист Гүлмира Әбіқайдың жазуынша, 21 жастағы жігіт Standoff2 деген ойынды ойнаған екен.

“Астаналық 21 жасар жігіт өз отбасын қырып салды. Ойынның соңына түскен геймер түнгі 03:00 болғанын да білмеді:
— Телефонды қой! Осы ойынды ойнамашы, ұйықтайық деп ескертеді тәтесі.
Бұл ескерту, әлбетте, ойынқұмарға жақпай қалады. Бәрі ұйықтағанымен, ол ұйықтамады. Есіл-дертін жаулаған онлайн-ойынның көмегімен жымысқы пиғылын іске асырды. Бір үйде тұратын жақын туыстары ұйықтады-ау дегенде бәрін тамақтан орып, пышақтап тастады. Әлеуметтік желіде жігіт Standoff2 ойынына баспен кіріп кеткен деседі”, - деп жазды журналист.

Алдын ала мәлімет бойынша, 60 және 50 жастағы апалы-сіңлімен бірге ағаларының баласы Жанғали Жұматаев тұрған. Жас жігіт қолына асхана пышағын алып, ескерту жасаған тәтесінің ұлына 20 рет пышақ сұққан. Салдарынан 28 жастағы ер адам мерт болды.