Тонап кеткен: Дикий Арманның досы ұсталды

Бас прокуратура Әзербайжанда Дикий Арманның досы, қазақстандық Жанболат Серіковтың ұсталғанын айтты, деп хабарлайды Bugin.kz порталы.

Қадағалаушы органның мәліметінше, Жанболат Серіковты Әзербайжан аумағында Біріккен Араб Әмірліктері органдарының сұрауы бойынша ұстаған.

“Бұл ретте Ж. Серіковке құқық қорғау органдары тарапынан қылмыс жасағаны үшін іздеу жарияланған жоқ, сол себепті оны Қазақстанға экстрадициялау мәселесі қазіргі уақытта қарастырылмайды", – деп хабарлады Бас прокуратура.

Мәліметтерге сүйенсек, жаңа жыл түні Дубайда Finiko қаржы пирамидасының негізін қалаушы Эдвард Сабировқа шабуыл жасалды. Жанболат Серіков тонаған топтың ұйымдастырушысы болған.

Айта кетейік, қаңтар айының басынан бастап түрлі ақпарат көздері қарулы шабуыл мен 327 мың доллар ұрлау ісіне байланысты Анорбек Төмібаев пен Есболат Кенжеғазының ұсталғанын хабарлады. Олар Ресейден ұшып шығуға тырысқан кезде бірі Внуково әуежайында, екіншісі Домодедово әуежайында қолға түскен. Айта кетерлігі, ұсталғандардың өздерінен ақша табылмаған. Болжам бойынша, күдіктілер БАӘ-дан ұшар алдында ақшаны криптовалютаға айналдырып үлгерген болуы мүмкін.