Ақтөбеде бүйрегін саудалаған ер адам сотталып кетті

Ақтөбеде бүйрегін 9 млн теңгеге сатпақ болған  ер адам сотталды, деп хабарлайды Bugin.kz порталы. 

Ақтөбе қаласы №2 сотында бүйрегін саудаламақ болған ер адамның ісі қаралды. Сот мәліметіне сүйенсек, 2024 жылдың маусым айында тұрақты табыс көзі болмаған соң сотталушы телеграм арнасына өзінің бір бүйрегін сататыны жайлы жазған. Ол бір бүйрегін 9 млн теңгеге бағалаған. Өткен жылдың қыркүйегінде хабарландыруға құқық қорғау органдарымен жұмыс істеген куәгер жауап берді. Олар бір бүйректі сатып алу-сату жөнінде келісімге келген. Керекті медициналық тексеруден кейін айыпталушы куәгерден 5 млн теңге алып жатқан жерінде ұсталды. Сот үкімімен ер адам 1 жылға бас бостандығынан айырылды. 

“Сот үкімімен айыпталушы У. қылмыстық кодекстің 116-бабының 1-бөлігі – 24-бабының 3-бөлігі, яғни “Адамның органдарын және тіндерін алуға мәжбүрлеу немесе заңсыз алу” бойынша кінәлі деп танылды. Оған 1 жыл бас бостандығынан айыру жазасы тағайындалды. Қылмыстық кодекстің 63-бабының ережелерін қолдана отырып, жаза шартты деп есептеліп, пробациялық бақылау тағайындалды”, – деп мәлімдеді Ақтөбе қаласының соты.