5 жігіттің құрбаны болған ақтаулық бойжеткеннің ісі туралы тың дерек шықты

Маңғыстау облыстық соты ақтаулық тренер Алинаға қатысты іс бойынша апелляцияны кейінге қалдырды, деп хабарлайды Bugin.kz порталы. 

Марқұмның інісінің айтуынша, апелляциялық сот отырысы 21 қаңтарда сағат 09:30-да басталуы керек болған. Алайда кейінірек апелляциялық шағымды қарау 27 қаңтарға ауыстырылғаны белгілі болды. "Не молчи" қорының жетекшісі Дина Тәңсәрі әлеуметтік желідегі парақшасына айыпталушылардың бірінің адвокаты келмегенін де мәлімдеген. 

Еске салайық, 2024 жылғы мамырда Ақтауда жантүршігерлік қылмыс болды. Бес ер адам 29 жастағы спортшы қызды ұрлап, соққыға жығып, оған мәжбүрлі түрде есірткі беріп, зорлаған. Сонымен қатар қыздың атына 2 млн теңге несие рәсімдеп, болған жағдай туралы біреуге тіс жаратын болса, “өлтіреміз” деп қорқытқан. 

Осылайша бойжеткен құрбысының пәтеріне барып, оған бар жағдайды баяндаған. Көп ұзамай Алина биіктен секіріп, өз-өзіне қол жұмсады. 

2024 жылдың 18 желтоқсанында қылмыстың басты фигурантына сот 20 жыл, ал қалғандарына 6 жылдан 8,5 жылға дейін бас бостандығынан айыру жазасын тағайындады. Қыздың туыстары бірнеше жыл ішінде кінәлілер шартты түрде мерзімінен бұрын босап шығуы мүмкін деп қорқады. 

2025 жылғы қаңтарда Маңғыстау облысының прокурорлары апелляция берді. Мемлекеттік айыптау тарапынан сот үкімі тым жеңіл деп танылды. Марқұмның туыстары мен адвокаты айыпталушылардың өмір бойына бас бостандығынан айырылғанын қалайды.