Картоп бағасы шарықтап кетті: 50-ге жуық заңбұзушылық анықталды

Қазақстанның Сауда және интеграция министрлігі өңірлердегі картоп бағасының өсуіне қатысы олқылықтарды тапты, деп хабарлайды Bugin.kz порталы. 

Сауда және интеграция министрлігі мәліметінше, жыл басынан сауда үстемесін 15 пайыздан асырмау бойынша 20 аймақтық комиссия өтіп, олардың барысында әлеуметтік маңызы бар өнім саналатын картопқа қатысты 49 заңбұзушылық анықталған. Министрлік анықталған барлық деректер бойынша тиісті әкімшілік шаралар қабылдайтынын айтты. 

Министрлік бүгінде Астанадағы сауда желілерінде картоптың орташа бағасы 280-185 теңгеге дейін төмендегенін хабарлады.

Сауда комитетінің мониторингі бойынша, бүгінде Қазақстан бойынша картоптың орташа бағасы 322 теңге екен. 

"Әлеуметтік дүкендер мен ӘКК серіктестерінде – елдің барлық аймақтарында картоптың көлемі жеткілікті және нарықтағы бағадан төмен сатылып жатыр", - делінген хабарламада.

Еске салайық, бұған дейін Қазақстанда картоп бағасын тұрақтандыру үшін экспортқа шектеу енгізілгенін хабарлаған едік.