Қазақстанда әскер құрамын толықтыру үшін жаңа әскери қызмет енгізіледі

Қазақстанда “Резервтегі әскери қызмет” пайда болады, деп хабарлайды Bugin.kz порталы. 

Резервтегі қызмет мәселелері бойынша өзгерістер мен толықтырулар енгізу туралы заң жобасы Мәжілісте мақұлданды.

Мәжілістің жалпы отырысында резервтегі қызмет мәселелері туралы заң екінші оқылымда қабылданды. Заң жобасы 2024 жылдың 15 қарашасында бірінші оқылымда мақұлданған. 

Құжатты депутат Ермұрат Бәпи таныстырды. Депутат Ермұрат Бапи заң жобасы резервтегі қызмет мәселелері бойынша заң жобасын әзірлеп, әскерге жұмылдыру дайындығы мен жұмылдыру жүйесін одан әрі жетілдіру қажеттілігіне байланысты туындағанын айтты. Енді елімізде “резервтегі әскери қызмет” және әскери қызметшінің жаңа санаты – “резервтегі әскери адам” ұғымдары пайда болады. Бұл әскер құрамын толықтырудың қосымша әдісі. Заң жобасын қарау барысында мәжілісінің депутаттары 100-ге жуық түзету енгізген.

Депутат Айдос Сарым бұл заң жобасы қарулы күштерге жұмсалатын қаражатты үнемдеу мақсатында қабылданып жатқанын айтты.

Депутаттың түсіндіруінше, резервтегі әскери адам белгілі бір жасқа келгенге дейін әскери комиссия тізімінде тұрады. Ол әскерге шақырылған кезде оған тиісті жалақы тағайындалып, жұмыс орны сақталады. Сонымен бірге әскери қызметі барысында резервтегі азамат шені өсіп, капитан және т.б. дәрежелерге көтеріле алады.