Қазақстанда алаяқтықтың жаңа түрі тарады

Қазақстанда көлік сату-сатып алуға байланысты алаяқтықтың жаңа түрі пайда болды, деп хабарлайды Bugin.kz порталы. 

Бұл туралы Алматы полициясы мәлімет таратты. Полиция автокөліктерге қатысты алаяқтық жасады деп күдікке ілінген 29 жастағы тұрғынды ұстады. Шығын көлемі 40 миллион теңгеден асады.

Полицияның мәліметінше, алаяқтар сайттардан автокөлік сату туралы жеке хабарландыруларды іздейді. Содан кейін көлік иелерімен байланысып, көлігін кепілдікте тұрған өз көлігіне "айырбастау" туралы ұсыныс жасайды. 

Шын мәнінде, кепілде тұрған ешқандай көлік болмайды. Одан әрі алаяқтар жалған құжаттарды қолданып, сатушыларды мәміленің қауіпсіздігіне сендіреді. Көлікті қолына алғаннан кейін алаяқтар жоғалып кетеді, ал жәбірленуші ақшасыз әрі көліксіз қалады.

Осы іс бойынша бірнеше жәбірленушінің арызданғаны белгілі болды. Сондай-ақ күдіктінің бұрын да қылмыстық жауапкершілікке тартылғаны анықталды.