Бір адамға 5 келі: Астанада картоп сатылымы шектелді

Астанада танымал сауда желілерінде картоп сатылымына шектеу енгізілді, деп хабарлайды Bugin.kz порталы. 

Астанада картоп сатуға уақытша шектеу енгізілді. Бірқатар сауда желілерінің дүкендерінде бір адамға 5 килограмнан артық картоп берілмейді. Астана қалалық Инвестициялар және кәсіпкерлікті дамыту басқармасы жағдайды түсіндірді.

"Астанада картоп бағасын тұрақтандыру үшін барлық қажетті шара қабылданды. Картоп тапшылығы жоқ. Қаладағы сауда желілері мен базар сөрелерінде картоп жеткілікті. Оның қоры уақытылы толықтырылып отыр. Өнімді делдалдар көтермелеп сатып алып, әрі қарай үй маңындағы дүкендерге өткізбес үшін бірқатар сауда желілерінің бөлшек сауда нүктелерінде картопты сатуға уақытша шектеу енгізілді, енді бір адамға 5 килограмнан артық берілмейді", - деп хабарлады басқарма өкілдері. 

Еске салайық, картоп бағасы шарықтап, жедел іздестіру нәтижесінде 50-ге жуық заңсыздықтар анықталғанын хабарлаған едік.