Қазақстанда үш АЭС салынуы мүмкін

Премьер-министр Олжас Бектенов Үкіметтің кеңейтілген отырысында биыл Қазақстанда үш атом электр станциясы салынуы мүмкін екенін айтты, деп хабарлайды Bugin.kz порталы. 

"Алматы облысында алғашқы атом электр станциясын салу бойынша келісімдер таяу уақытта жасалады. Сонымен қатар екінші және үшінші АЭС құрылысына қолайлы аймақтарды анықтау бойынша талдау жұмыстары аяқталуға жақын", – деді ол.

Еске салайық, қазіргі таңда Алматы облысы Жамбыл ауданына қарасты Үлкен ауылының маңында қуаты 2–2,8 ГВт болатын атом электр станциясын салу жобасы қарастырылып жатыр.

Министрліктің мәліметінше, ядролық технологияны жеткізушілермен келіссөздер белсенді жүргізілуде. Сонымен қатар жобаны талдау және таңдау үдерісін жүзеге асыру үшін арнайы үкіметаралық комиссия құрылған.

Энергетика министрлігі хабарлағандай, жаңартылатын энергия көздері мен газ генерациясын енгізу арқылы электр энергиясын тұтынудағы көмір генерациясының үлесін азайту жоспарланып отыр. Осы шаралардың нәтижесінде 2035 жылға қарай атмосфераға бөлінетін көмірқышқыл газының көлемін жылына 44 млн тоннаға төмендету көзделген.

Қазіргі уақытта еліміздегі энергия жүйелері тұрақты режимде жұмыс істеп тұр. Жылыту маусымы да жоспарға сай өтіп жатыр. Министрліктің мәліметінше, жүзеге асырылып жатқан жобалар қажетті ресурстармен қамтамасыз етілген.

Айта кетсек, 2 қыркүйекте Президент Қасым-Жомарт Тоқаев АЭС салу мәселесі бойынша республикалық референдум өткізу туралы Жарлыққа қол қойған болатын. Ал референдум 6 қазанда өтті. Дауыс берген қазақстандықтардың 71,12 пайызы АЭС салуды қолдады.

Қазақстанның ықтимал технология жеткізушілері қатарында "Росатом" (Ресей), CNNC (Қытай), KHNP (Корея) және EDF (Франция) компаниялары бар. Сонымен қатар, мемлекет халықаралық консорциум құру мәселесін қарастырып жатыр.

Президент Қасым-Жомарт Тоқаевтың айтуынша, АЭС құрылысы Қазақстанның энергетикалық қауіпсіздігін нығайтуға ұзақмерзімді инвестиция болады.

"Біз әлемдегі ең ірі уран өндірушілердің бірі саналамыз, сондықтан бұл жоба еліміздің стратегиялық басымдығының бір бөлігі болып табылады," – деп атап өтті Президент.