Болат Назарбаевтың қолшоқпары болған Қоспаевқа сот үкімі шықты

Болат Назарбаевтың “оң қолы” Елдос Қоспаевтың қылмыстық тобына қатысты сот үкімі шықты, деп хабарлайды Bugin.kz порталы.

Астана қаласының қылмыстық істер жөніндегі мамандандырылған ауданаралық соты 11 адамнан тұратын Елдос Қоспаевтың қылмыстық тобының мүшелеріне үкім шығарды. Елдос Қоспаев 15 жылға бас бостандығынан айырылып, қауіпсіздігі орташа колонияда жазасын өтейтін болады.

Қоспаевтар ағайындысы, яғни Елдос, Айдос және Айбек Қоспаевтар ұйымдасқан қылмыстық топ құрып, бірнеше ірі кәсіпорынды басып алған. Атап айтқанда “AV-Construction” ЖШС, “Стекольный завод” ЖШС, “Шалқар 17” ЖШС және “Бахар-А” ЖШС. Қаржы мониторинг агенттігі тергеу жүргізіп, Айдос Қоспаевқа тиесілі мүлікке тыйым салған болатын.

Сонымен қатар Қаржы мониторинг агенттігі ағайындылардың басқа да қылмыстарын анықтаған. Олардың бірі “Азаматтарға арналған үкімет” базасына жалған мәлімет енгізу арқылы 2,2 миллиард теңгеге бағаланған мүліктер мен жер учаскелерін шетелдік инвесторларға сату мақсатында басқа тұлғаларға қайта рәсімдеуді жүзеге асырған.

Алаяқтық әрекеттері үшін бұрын сотталған үш адам ұсталып, қамауға алынған.