Әлемдегі ең үлкен фестиваль кезінде адамдар тапталып қаза болды

Әлемдегі ең үлкен фестивальда кемінде жеті адам қаза тапты, деп хабарлайды Bugin.kz порталы. 

Қайғылы оқиға Үндістандағы Маха Кумбх Мела фестивалінде болды. Жеті адам қаза тауып, шамамен 10 адам жарақат алды. 

Оқиға бүгін, 29 қаңтарда Праяградждағы шатыр қалашығында болды. Бұл жерде миллиондаған қажылар қасиетті жуыну рәсіміне келген еді. Бұл алты апталық индуизм фестивалінің ең маңызды күніндегі ерекше рәсім болған. 

Мәліметтерге сүйенсек, адамдар Ганга, Ямуна және мифтік Сарасвати өзендерінің түйіскен жеріне жиналды. Куәгерлердің айтуынша, келген адамдар арасында төбелес басталған. Трагедияның себептері әлі анықталған жоқ.

"Көбісі құлап, тобыр оларды таптап кетті. Балалар мен әйелдер адасып кеткен", - деді Мумбайдан келген Равин есімді қажы.

Билік адамдарды құтқару және жағдайды бақылау үшін жедел штаб құрды. Үндістан премьер-Министрі Нарендра Моди зардап шеккендерге көмек көрсетуді және тәртіпті қалпына келтіруді тапсырды.