Елде алаяқтықтың жаңа түрі тарады

Алматы киберполициясы Қазақстандағы алаяқтықтың жаңа түрі туралы ескертті, деп хабарлайды Bugin.kz порталы. 

Бұл туралы ІІМ-нің баспасөз қызметі мәлімдеді. Алаяқтықтың жаңа түрі отандық заңды тұлғалардың қатысуымен болады екен. Бұл алаяқтыққа көбінесе шетелден келген адамдар жетекшілік ететін көрінеді. Олар қазақстандық ЖК, ЖШС меншіктерін өз ісін дәлелді ету үшін пайдаланады. 

“Бұл қалай болады: қаскөйлер жомарт сыйақы беремін деп адамды өз атынан компания ашуға және оны жалға беруге көндіреді. Сонымен қатар заңды тұлғаның иесі өзін алаяқтық тізбекке араластырып жатыр деп күдіктенбеуі де мүмкін”, - дейді полиция. 

Сонымен қатар, полицейлер ЖК мен ЖШС-ні үшінші адамдарға жалға бермеуді сұрайды. Өйткені жалға алынған ЖК мен ЖШС-ні қылмыстық мақсатқа пайдалану деректері жиілеп барады екен. 

“Әйтпесе, қылмыстық жауапкершілікке тартылуыңыз мүмкін. Сондай-ақ сізден келтірілген материалдық залалды азаматтық іс жүргізу тәртібімен өндірілуі мүмкін", - деді Алматы қалалық ПД киберқылмысқа қарсы күрес басқармасының бастығы Анес Қалдыбаев.