Енді легионерлерге мемлекет қаражат бөлмейді

Бұдан былай легионерлерге мемлекеттен қаржы бөлінбейді, деп хабарлайды Bugin.kz порталы. 

Мәжіліс қабылдаған дене шынықтыру және спорт мәселелері бойынша заңға Қазақстан азаматтығы жоқ спортшыларды бюджет қаражаты есебінен және квазимемлекеттік сектор субъектілері қаражаты есебінен қаржыландыруға тыйым салу туралы өзгеріс енгізілді. 

Осыған орай енді мемлекет легионерлерге қаржы бөлмейді. Бұл норма президенттің мемлекеттік қаражатты тиімді пайдалану туралы тапсырмасын орындау мақсатымен әзірленді. 

“Спорт мекемелері іс-шараларды (спорттық жарыстар, семинарлар, кеңестер мен конференциялар) ұйымдастыру және өткізу мақсатымен халықты арнайы спорттық жабдықтармен, дене шынықтыру-сауықтыру және спорт объектілерімен қамтамасыз ету бойынша қызметтер, спорттық медицина саласындағы қызметтер арқылы табыс таба алады”, - деп мәлімдеді мәжілістің баспасөз қызметі.

Еске салайық, бұған дейін мәжіліс депутаты футбол легионерлерінен бас тартуды ұсынғанын хабарлаған едік.