Қазақстан Орталық Азиядан 11 млрд текше метр су алады

Қазақстан Орталық Азия мемлекеттерімен ортақ келісімге келді. Бұл туралы Су ресурстары және ирригация министрлігі мәлімдеді, деп хабарлайды Bugin.kz порталы. 

Бұл мәселе Душанбе қаласында өткен Орталық Азияның Мемлекетаралық су шаруашылығын үйлестіру комиссиясының (МСШҮК) 88-отырысында қарастырылды. Жиынға Қазақстан, Өзбекстан, Тәжікстан және Түрікменстанның су шаруашылығы саласындағы басшылары қатысты. Кездесуде Сырдария және Әмудария өзендері бассейндеріндегі вегетация аралық кезеңнің өту барысы талқыланды.

Министр Нұржан Нұржігітовтің айтуынша, бұл келісім жазғы суару маусымына қажетті су қорын жинауға және Қазақстанның оңтүстік өңірлеріндегі экожүйені сақтауға мүмкіндік береді.

“Оңтүстік аймақтың жағдайы батыс пен солтүстік өңірлерден өзгеше. Мұнда көктемгі су тасқыны байқалмады, алайда жазда суармалы суға деген сұраныс өте жоғары. Сондықтан біз бұл өңірді сумен қамтамасыз ету бойынша ерекше тәсілдер қолданудамыз. Су дипломатиясы – біздің негізгі басымдықтарымыздың бірі. Өткен жылы осындай келіссөздер нәтижесінде еліміздің оңтүстігін тұрақты сумен қамтамасыз ете алдық. Біз су бөлу және трансшекаралық су нысандарын қорғау мәселелерін Орталық Азиядағы әріптестерімізбен бірлесіп шешіп келеміз”, – деді министр.

Келісімге сәйкес, бөлінген су Сырдария өзені арқылы Түркістан облысындағы Шардара су қоймасына бағытталады. Оның ішінде 1,6 миллиард текше метрі Арал теңізіне жіберіледі.