Қазақстанда мобильді аударымға жаңа лимит енгізілуі мүмкін

Алдағы уақытта елімізде мобильді ақша аударымдарына байланысты жаңа лимит енгізілуі мүмкін, деп хабарлайды Bugin.kz порталы. 

“Параграф” ақпараттық ресурсының мәліметінше, егер үш ай ішінде шотқа түскен қаражаттың жалпы көлемі 1,02 миллион теңгеден асса, бұл деректер салық органдарына жіберілетін болады.

Қазіргі уақытта Қаржы министрінің тиісті бұйрығы Ұлттық банктің қарауында екені белгілі болды.

Айта кетейік, бұған дейін салық органдары қатарынан үш ай бойы 100-ден астам адамнан ақша қабылдаған жеке тұлғаларды ғана бақылауға алып келген. Мұндай жағдай анықталған кезде, азаматтың ЖСН-і Мемлекеттік кірістер комитетіне жіберіліп, оған камералдық бақылау жүргізілетіні туралы хабарлама жолданады. Нәтижесінде, тұлға өз атына не үшін осынша аударым жасалғанын түсіндіруі тиіс. Ол үшін 30 жұмыс күні беріледі. Егер белгіленген мерзімде жауап берілмесе, оның шотынан қаражат шығару уақытша тоқтатылады.