Бензин бағасы такси қызметіне әсер ете ме? – Көлік министрі жауап берді

Үкіметтің брифингінде көлік министрлігі басшысы жанармай бағасының өсуі такси қызметтеріне қалай әсер ететінін айтты, деп хабарлайды Bugin.kz порталы. 

Бензин бағасы алдағы бірнеше күнде 5 теңгеге қымбаттайды. Марат Қарабаевтың айтуынша, такси қызметтерінің бағасын мемлекет реттемейді. Егер такси жүргізушілері үшін өз-өзін реттейтін ұйымдар құрылса, бензиннің қымбаттауына қарамастан, такси бағасы төмендеуі мүмкін екен. 

“Біз кеше өз-өзін реттейтін ұйымдар туралы заң жобасын талқыладық. Соның аясында интернет-агрегаторлар мен такси жүргізушілері өзара келісімге келіп, 1 шақырым жол жүру құнын және агрегаторлардың пайыздық мөлшерлемесін анықтай алады. Бұл – такси жүргізушілері мен агрегаторлар арасындағы нарықтық қатынас”, - деп түсіндірді ол.

Кейін Марат Қарабаев өз-өзін реттейтін ұйымдардык құрылуы такси жүргізушілерінің қызметіне қалай әсер ететінін айтты.

“Заң жобасында барлық такси жүргізушілерінің оған кіруі міндеттелмейді. Тек заңды тұлғалар ғана қосылады. Қазақстанда қазір 2 мың такси компаниясы және 200 мың көлік бар. Біз бұл жобаны мәжіліспен бірге пысықтап жатырмыз. Алдымен пилоттық режимде белгілі бір өңірде сынап көреміз. Осылайша қауымдастықты бүкіл жерге енгізу жоспарланып отырған жоқ”, – деді министр.

Сонымен қатар министр заңды тұлғалар үшін 900 теңгеден 100 теңгеге дейін төлем мөлшерлемесін төмендету мүмкіндігіне тоқталды. Бұл қаражат ұйымдарға заңгер немесе білікті қызметкер жалдау үшін қарастырылып отыр.