Елде қыз алып қашуға заңмен тыйым салынуы мүмкін

Мәжіліс кулуарында депутат Мұрат Әбенов заңнамаға енгізілуі мүмкін өзгертулер туралы айтты, деп хабарлайды Bugin.kz порталы.

Оған сәйкес қыз алып қашуға қылмыстық жаза қарастырылады.

"Мен түзету енгізуге ұсыныс жасадым, ол қазір Қылмыстық, Қылмыстық-атқару және Қылмыстық іс жүргізу кодекстерін оңтайландыру жөніндегі жұмыс тобының қарауында. Жауапкершіліктің бірнеше түрі қарастырылған, оның ішінде қылмыстық жауапкершілік – бас бостандығынан айыру, айыппұл, қоғамдық жұмыстар. Мұның бәрі жағдайға байланысты. Бір топ адам жасаса, кәмелетке толмаған адамға қарсы жасалса, қандай да бір зиян келтірілсе, т.б. заң жәбірленуші жағында болуы керек", - деді депутат. 

Депутаттың мәліметінше, қыз алып қашуға ұсынылып отырған жаза – қызды еркінен тыс ұстаған, сондай-ақ психологиялық және физикалық қысым көрсеткен жағдайда 3 жылдан 5 жылға дейін бас бостандығынан айыру.