Ақтөбеде “әлеуметтік” газды ұрлаған қылмыстық топ ұсталды

Ақтөбе облысында кен орнынан "әлеуметтік" газды заңсыз алып, сатумен айналысқан қылмыстық топ құрықталды, деп хабарлайды Bugin.kz порталы хабарлайды.

Облыстық Полиция департаментінің ұйымдасқан қылмысқа қарсы күрес басқармасы прокуратура және ҰҚКД-мен бірлесіп, газ ұрлау схемасын ұйымдастырған бір топ адамды ұстады. Тергеу барысында олардың газ өндіруші компаниялардың бірінде жұмыс істегені анықталды.

ІІМ ұйымдасқан қылмысқа қарсы күрес департаментінің өкілі Қуандық Алпыстың айтуынша, күдіктілер есепке алынбаған газды жинап, кейін оны темір жол арқылы тасымалдаған. 

“Кен орнынан сату орнына бара жатқан жолда ұрланған газы бар 12 вагон ұсталды. Тиісті сараптамалар тағайындалды, нәтижелері бойынша келтірілген шығынның сомасы белгіленеді. Жедел тергеу іс-шаралары жалғасып жатыр”, — деді ІІМ ұйымдасқан қылмысқа қарсы күрес департаментінің өкілі Қуандық Алпыс.