Алматы қаласы мәдениет басқармасының бұрынғы орынбасары істі болып жатыр

Алмалы аудандық сотында Алматы қаласы мәдениет басқармасының бұрынғы орынбасары Наиля Мулюковаға қатысты іс қайта қаралуда, деп хабарлайды Bugin.kz порталы. 

ГосАрхив телеграм арнасының мәліметінше, оған бюджет қаражатын жымқыру және қызметтік өкілеттігін асыра пайдалану бабы бойынша айыптар тағылып отыр. 

Тергеу мәліметіне сүйенсек, Мулюкова “Безендіру KZ” компаниясымен заңсыз мемлекеттік сатып алулар жүргізген. Бұл фирма бір жылда 456 миллион теңге көлеміндегі тендерлерді ұтып алған, бірақ іс жүзінде жұмсалған қаржы әлдеқайда аз болған. Осыдан мемлекетке 92,8 миллион теңге шығын келген деп есептелуде.

Алматы мәдениет басқармасы Мулюковадан 125,6 миллион теңге өндіріп алуды талап етіп отыр, бірақ осы соманың қалай есептелгені түсіндірілмеді. Сот процесі төрт ай бойы тоқтап тұрды, себебі қорғаушы тарап айыптаулардың негізсіз екендігін дәлелдеу үшін қайта сараптама жүргізуді сұраған. Соңғы сот отырысында қорғаушы тарап жаңа сараптама қорытындысын ұсынды, онда бастапқы келісімшарттарда көрсетілген мәліметтердің толықтай расталуы айтылған.

Соттағы шиеленіс кезінде қорғаушы тарап айыптаушылар мен сотты қылмыстық-процестік нормаларды бұзды деп айыптады. Жәбірленуші тараптың өкілі адвокаттың кәсіби этиканы бұзғанын айтып, оны жауапқа тартуды талап етті. Алайда сот екі тараптың да өтініштерін қанағаттандырмай, істі әрі қарай қарауды шешті.

Мулюкова барлық мемлекеттік сатып алулар заң аясында өткізілгенін айтады, ал мәдениет басқармасы бұл қаражаттың тиімсіз жұмсалғанын айтып, қаражатты қайтаруды талап етуде. Бұл сот ісі Алматыдағы ең даулы жемқорлық істерінің біріне айналуы мүмкін.