Экс-министр Арыстанбек Мұхамедиұлы аштық жариялады ма?—ҚАЖК жауап берді

Экс-министр Арыстанбек Мұхамедиұлының түрмеден жазған хаты жалған болып шықты, деп хабарлайды Bugin.kz порталы.

Қазақстанның бұрынғы мәдениет және спорт министрі Арыстанбек Мұхамедиұлы 11 жылға бас бостандығынан айырғанына наразы екенін білдіріп, аштық жариялағанын хабарлаған еді. 

“Мен аштық жариялаймын. Өйткені өзімді әу бастан-ақ кінәсіз деп санадым!”, – делінген экс-министрдің атынан жазылған мәлімдемеде. 

Ішкі істер министрлігіне қарасты қылмыстық атқару жүйесі комитеті экс-министр Арыстанбек Мұхамедиұлының әлеуметтік желідегі жазбасынан кейін тексеру басталатынын хабарлады.

"Сотталған адамның аштық жариялағаны туралы ақпарат шындыққа жанаспайды. Ол тамағын ішіп жүр, мұны бейнебақылау камераларының жазбалары растайды. Одан шағымдар мен өтініштер түскен жоқ. Тәртіпке сәйкес сотталған адам ұялы телефон ұстай алмайды. Оның атынан әлеуметтік желілерде жазба жариялау фактісі бойынша тексеру жүргізіледі. Еске сала кетейік, жалған ақпарат таратқаны үшін жауапкершілік қарастырылған”, – деп хабарлады ҚР ІІМ ҚАЖК баспасөз қызметі Ulysmedia.kz тілшісіне. 

Еске салайық, Мұхамедиұлы “Дипломат” қонақүйін рейдерлік жолмен тартып алу және “Алтын адамның әлем музейлеріне шеруі” көрмесін ұйымдастыру кезінде қаржы жымқыру ісі бойынша кінәлі деп танылған. Алайда ол сот процесінде заң бұзушылықтар болғанын айтып, өзінің ісін қайта қарауды талап еткен еді.