Ақтөбеде танысының денесін бөлшектеп, басын тоңазытқышқа тыққан ер адам сотталды

Ақтөбеде оттық үшін танысының денесін бөлшектеп, басы мен іш-құрылысын тоңазытқышта сақтаған қос адамға сот үкімі шықты, деп хабарлайды Bugin.kz порталы КТК арнасына сілтеме жасап. 

Іс материалына сүйенсек, 3 ер адам бірге ішімдік ішіп отырып, оттықты іздей бастайды. Кейін өзара жанжал туындап, сотталушы досының ішіне пышақ сұғады. Қылмысын жасыру мақсатында ер адамның денесін жуынатын бөлмеге алып барып, оны бөлшектейді. Ал үшінші адам қылмысты жасырып қалады. 

Айуандықпен адам өлтіргендерге қатысты сот тез аяқталған. Осыдан екі апта бұрын сотталушылар алқа билердің үкіміне жүгінетін айтқан еді. Сол уақыт аралығында алқа билер мүшесі іріктеліп, жауап алу да өткен.

"Сот басталмай жатып бас бостандығынан айрылғандардың бірінің анасы баласынан безініп кеткенін мәлімдеді. Себебі оның бұрын да осындай сұмдыққа барғанын айтады", - деп жазылған мәліметте.

Сот шешімі бойынша, қылмысты жасаған ер адам 11 жылға, қылмысты жасырған күдікті 4 жылға бас бостандығынан айырылды.